ԵՐԵՒԱՆ, «Արմէնփրէս».- ԵՈՒՆԵՍՔՕն պատրաստ է աջակցելու Հայաստանին եւ Ատրպէյճանին՝ Լեռնային Ղարաբաղի պատմամշակութային կառոյցներու պահպանման գործին եւ կը նախատեսէ հոն ուղարկել մասնագէտներու խումբ մը: Այս մասին, ըստ ԵՈՒՆԵՍՔՕի պաշտօնական կայքին՝ յայտնեց ԵՈՒՆԵՍՔՕի գլխաւոր տնօրէն Օտրէ Ազուլէ:
«Հայաստանի եւ Ատրպէյճանի ներկայացուցիչներուն հետ հանդիպումներուն ընթացքին գլխաւոր տնօրէնը պաշտօնապէս առաջարկեց ճարտարարուեստական օժանդակութիւն տրամադրել ԵՈՒՆԵՍՔՕի կողմէ, որուն ներկայացուցիչները, սակայն, մինչ օրս չէին կրցած այցելել այդ տարածքներ: Անոնք կրնան դաշտային առաքելութիւն իրականացնել բոլոր շահագրգիռ կողմերուն համաձայնութեամբ, որպէսզի կազմեն տարածաշրջանի ժառանգութեան առաւել նշանակալի մշակութային արժէքներու նախնական ցանկը: ԵՈՒՆԵՍՔՕն պիտի աշխատի համապատասխան բոլոր կողմերուն հետ, որպէսզի պայմաններ ստեղծէ այս առաքելութեան համար: Նախաձեռնուած են բարձր մակարդակի խորհրդակցութիւններ ԵԱՀԿի Մինսկի խումբի համանախագահ երկիրներուն հետ», յայտնեց Օտրէ Ազուլէ՝ աւելցնելով, որ Ատրպէյճանի եւ Հայաստանի ներկայացուցիչներուն հետ հանդիպումները տեղի ունեցան 18 Նոյեմբերին։