Պարգեւատրուեցին Քալիֆորնիայի Ասմունքի Մրցոյթ-Փառատօնի Յաղթողները

ՆԱՆԷ ԱՒԱԳԵԱՆ

Քալիֆորնիայի Ասմունքի մրցոյթ-փառատօնի գլխաւոր մրցանակներին այս տարի արժանացան Ռոզ եւ Ալէք Փիլիպոս Ազգային վարժարանի աւագ դպրոցի աշակերտուհի Անի Թովմասեանը, Ազգ. Վ. եւ Ա. Շամլեան դպրոցի 8րդ դասարանցի Արա Եագուպեանն ու նախակրթարանի խումբը ներկայացնող, Դաւթեան-Մարիամեան կրթական հաստատութեան սան Էրիկ Չիլինգարեանը:

Յունիսի 25ին Ազգային առաջնորդարանի «Տիգրան եւ Զարուհի Տէր Ղազարեան» սրահում անցկացուած պարգեւատրման արարողութեան ժամանակ, առաջին տեղը զբաղեցրած աշակերտներն ասմունքեցին՝ եւս մէկ անգամ փաստելով, որ իրապէս արժանի էին առաջին մրցանակին: Անին մեծ յուզումով ներկայացրեց Վահագն Դաւթեանի «Ռեքուիէմ»ը, Արան՝ Պարոյր Սեւակի «Եռաձայն Պատարագ»ից հատուածի կատարմամբ կրկին հիացրեց ներկաներին, փոքրիկ Էրիկն էլ Սեւակի «Անլռելի Զանգակատուն»ից իր մեկնաբանութեամբ վկայեց, որ սփիւռքահայի նոր սերունդն արժանիօրէն է կրում իր ազգի մշակութային ժառանգութիւնը:

Պարգեւատրման արարողութեանը ներկայ էին Արեւմտեան թեմի առաջնորդ Մուշեղ արք. Մարտիրոսեանը, հոգեւոր հայրեր, ՀՅԴ Բիւրոյի անդամ դոկտ. Վիգէն Եագուպեանը, Ազգային վարժարանների Խնամակալ մարմնի ներկայացուցիչ Ազիդա Եագուպեանը, վարժարանների տնօրէններ, ուսուցիչներ, ծնողներ ու մասնակիցների ընկերներն ու հարազատները:

Ասմունքի փառատօնի կազմակերպիչ խորհրդի ներկայացուցիչ, Ազգային վարչութեան փոխատենապետ դոկտ. Տիգրան Պապիկեանը ողջոյնի խօսքում յիշեցրեց, որ երկրորդ տարին անցկացուող փառատօնն այս տարի նուիրուած էր Հայոց Ցեղասպանութեան 100ամեակին եւ եւս մէկ անգամ առիթ էր հաստատելու ճշմարտութիւնը, որ ասմունքը կարեւոր տեղ ունի մեր մշակոյթի պահպանման գործում: Նա երախտիքի խօսքեր յղեց Քալիֆորնիայի Ասմունքի փառատօնի կազմակերպիչ յանձնախմբի անդամ, Շուշիում անցկացուող Ասմունքի համահայկական փառատօնի հիմնադիր Ալէք Բաղդասարեանին՝ նման միջոցառում նախաձեռնելու եւ աշխարհի տարբեր երկրներից հայ պատանիներին Արցախում միաւորելու համար:

Ալէք Բաղդասարեանն էլ պատմեց Շուշիում անցկացուող փառատօնի մասին՝ ցուցադրելով նկարներ նախորդ տարուայ ձեռնարկից: Նա խօսեց Շուշիի մշակութային նախկին փառքը վերականգնելու կարեւորութեան մասին՝ Ասմունքի փառատօնը համարելով որպէս այս նպատակին հասնելու քայլերից:

Յանձնախմբի անդամ Միհրան Թումաճեանը գոհունակութեամբ տեղեկացրեց, որ այս տարի մրցոյթ-փառատօնին միացել են երկու նոր դպրոցներ: Վահան եւ Անոյշ Շամլեան, Ռոզ եւ Ալէք Փիլիպոս, Սրբոց Նահատակաց Ֆերահեան, Մեսրոպեան Ազգային վարժարանների, Սրբոց Նահատակաց Մարի Գապայեան Ազգային նախակրթարանի, Հայ Քոյրերու վարժարանի եւ Դաւթեան Մարիամեան կրթական հաստատութեան նախակրթարանի, միջնակարգ եւ աւագ դպրոցների աշակերտները երկու օր շարունակ ասմունքեցին հայ նահատակ գրողների եւ 20րդ դարի բանաստեղծների ստեղծագործութիւններից: Թումաճեանը շնորհակալութիւն յայտնեց Ազգ. Վ. եւ Ա. Շամլեան վարժարանի տնօրէնութեանը՝ Մայիսի 2ին եւ 3ին դպրոցի սրահը մրցոյթի անցկացման համար տրամադրելու առիթով:

Նա ներկայացրեց միւս մրցանակակիր աշակերտներին. երկրորդ տեղին նախակրթարանի տարիքային խմբից արժանացել է Մեսրոպեան վարժարանի սան Թագուհի Հմայեակեանը, միջնակարգ եւ աւագ դպրոցի տարիքային խմբերում, համապատասխանաբար, Շամլեան վարժարանից՝ Մեղրի Շահինեանը, եւ Ֆերահեան վարժարանից՝ Նարեկ Գույումճեանը:
Երրորդ տեղը զբացեղրած մասնակիցներն էին՝ աւագ դպրոցի խմբից Մեսրոպեան վարժարանի աշակերտ Ալէք Մանուկեանը, միջնակարգի խմբից՝ Ֆերահեան վարժարանի սան Արազ Պալեանը, նախակրթարանի տարիքայի խմբում երրորդ տեղին արժանացան երեք աշակերտներ՝ Նարին Արիսեանը՝ Ս. Նահատակաց Մարի Գապայեան վարժարանից, Տարօն Տէր Սահակեանը՝ Հայ Քոյրերի վարժարանից, եւ Ալիս Խաչիկեանը՝ Մեսրոպեան վարժարանից:

Յաղթողները մեծ յուզումով եւ ոգեւորութեամբ էին ստանում պատուոգրերն ու Հայոց Ցեղասպանութեան իրականացման վայրերը մատնանշող՝ Էդիկ Բալայեանի պատրաստած քարտէսը:

Երախտիքի խօսքեր ուղղուեցին գնահատող խմբի անդամներին, ովքեր երկու օր շարունակ սիրով ու գորովանքով լսում ու ոգեւորում էին մասնակիցներին: Համայնքում ճանաչուած արուեստագէտ-մտաւորականները, «Լարք» երաժշտանոցի փոխտնօրէնուհի Թագուհի Արզումանեանը, դերասանուհի Շաքէ Թուխմանեանը, դերասան, ասմունքող Գրեգ Օգարեանը, «Ասպարէզ» օրաթերթի խմբագրական խորհրդի անդամ Ճորճ Ատուրեանը, ՀՄԸՄի «Արարատ» մասնաճիւղի «Կարմիր կակաչ» նախագծի ղեկավար, արուեստագէտ Էդիկ Բալայեանը, գնահատելու հետ մէկտեղ, ընդգծում էին, որ այս փառատօնի դէպքում կարեւորը մասնակցութիւնն է:

Պարգեւատրման արարողութեանը ներկայ Մուշեղ սրբազանն իր օրհնանքը յղեց ներկաներին, Ասմունքի փառատօնի մասնակիցներին շնորհակալութիւն յայտնելով՝ վայելքի գեղեցիկ պահեր մատուցելու համար, ծնողներին եւ ուսուցիչներին՝ նախաձեռնութեանը աջակցելու համար: «Այս ձեռնարկը համապատասխանում է Առակաց գրքի այն խօսքին, որ ասում է. «Կրթէ մանուկը իր ճամբան սկսած պահուն… որովհետեւ եթէ մանուկը ճիշդ հունի մէջ դրուի, Աստուծոյ շնորհքները կը պտղաբերեն», յիշեց առաջնորդ սրբազանը՝ նշելով, որ Ասմունքի փառատօնը նաեւ յուշում է, որ բոլորս բարձր գիտակցութեամբ եւ պատասխանատուութեամբ զգանք մեր պարտքը նոր սերունդների հանդէպ:

Սրբազանը «Հաւատք, Յոյս եւ Սէր» արձանագրութեամբ յուշանուէրներ յանձնեց մասնակիցներին՝ մաղթելով, որ աշակերտներն այդ ոգով բազմապատկեն իրենց շնորհները:

Երեկոն աւարտուեց Մուշեղ սրբազանի «Պահպանի»չ աղօթքով եւ «Մեր Հայրենիք» օրհներգով: Ներկաները վայելեցին հիւրասիրութիւնն ու առիթ ունեցան ծանօթանալու եւ շփուելու միմեանց հետ:
Յայտարարուեց, որ մրցանակային տեղեր զբաղեցրած մասնակիցները, ցանկութեան դէպքում, առիթ կ՛ունենան մասնակցելու Շուշիում Օգոստոսին նախատեսուած Ասմունքի համահայկական փառատօնին:
Քալիֆորնիայի ազգային վարժարանների Ասմունքի մրցոյթ-փառատօնն անցկացւում է Մուշեղ արք. Մարտիրոսեանի, Արեւմտեան թեմի Ազգային առաջնորդարանի Մշակութային դաստիարակչական յանձնախմբի ու Ազգային վարժարանների Խնամակալ մարմնի հովանաւորութեամբ ու կազմակերպութեամբ նաեւ՝ «Աւան Շուշի Պլազա» հիւրանոցի տնօրէնութեան, «Ասպարէզ» օրաթերթի եւ «Հորիզոն» հեռատեսիլի: Փառատօնի կազմակերպչական խորհրդի անդամներն են Ալէք Բաղդասարեանը, Տիգրան Պապիկեանը, Միհրան Թումաջեանն ու Նանէ Աւագեանը: